2 Corinthians 11
Paulo Xe ta Mitema sou Xaixai Kalakalavoi
1Eni aloopala lexe ngingi ngamomomo sou ngamalalixo no anu vaikala kalakalavoi noxilo uasi. Ia ngingi ne a nge'oxo'oxonu loxo ne mukalu. 2 aEni talelingenge aloxo Lataua anu tanungenge. Eni esakiinu vaikala noxinge sou mulumengi vilesisi e Kalisito mo sou eni amomomo sou alaixinge noxou aloxo lasove malemalenga ilai noxousi. 3 bIa eni taleli kalaua xo loxo Iva mikatululu no anu looloo noxou iaulu io xavuxavutalamenge ne u'oxo vile la umomomo sou uxexeenu xolu noxinge e laixe mo muisalili mulai noxou Kalisito ne, la u'oxongengi ngalai va'axu. 4 cXo lexe ta mitema mose'i ine'e ilaa vaikala sou Iesu ane va'axu noxou Iesu ane nexi tea'aloxu vaikala sou, xe lexe ngingi ngano'u uleenu vilemo no anu ane ngingi ngeno'u tei, mo a'alo laixe ane vile mo no anu ane ngingi ngeno'u tei 'o, la ngingi ngalooxu mo ngalomusousi ia ngamuline'i uasi. 5 dIa eni axavutala lexe eni akitu'a sevile no laaxa'a ta mitema sou xaixai iou ane mi'uli loxo ne uasi. 6 eEni melo loxo amitema sou vaivaikala laixe uasi, ia lavulavuxeni ne mu'oki. Nexi te'oxonu mii ane 'o lamana laixe mulai noxinge no anu votevote'i piena mukalusi.7 fLoxovaa anu susu sou eni alu'eleli la io atelainixinge sou alaanu a'alo laixe noxou Lataua ulai noxinge vitanisi io uulusilo uasi? 8 gEni exaxaisinge ne io eno'u su'uli noxi'a lalolalotu mose'i la sou no anu 'ilixo ne loxo eni epakaline'i. 9Mo no mine eni exolu noxinge ne io emasaxau mii vile, la eni elosinge ngingi vile ne tu'umaxu uasi, xo ta vivixe ane me'a ne Makedonia mine'e ne misaxila'ilo no anu mii ane eni no anu uasi. Eni melo eutulululeli la sou alosinge tu'umaxu no anu vote'i vile uasi, mo eni asolonu 'ilixo aloxo ne sio. 10Maninasou, loxo vaikala manina noxou Kalisito anu a uxolu noxilo 'o, la itema vile no nano no xalee lia tila ne Akaia umomomo sou utalosou tooxu noxilo ne uasi manina. 11Sou tava'u a loxovaa ne? Xo eni amasaxainge uasi? Lataua mulavusou lexe eni emasaxainge manina. 12Mo eni asolonu sou a'oxo'oxonu mii ma'ia ane eni a'oxo'oxonu ne lakolisou uasi. Mo sou a'oxo latoloxa'a ane'i ane imasaxa sou ino'u taiinu ane sou lexe ta mitema imaisi'a lexe ane'i mimomomo aloxo nexi 'osi no anu xaixai ane ane'i itooxa'a sou ne.
13Xo ta mitema ane loxo ne, ane'i ta mitema sou xaixai manina uasi, ta mitema sou xaixai kalakalavoi, ixiuxiuneisi loxo ta mitema ane Kalisito mupalusi'a. 14Mo tanenge liliu uasi, xo Satani ne molu uxixiunu sou uxali loxo anu angelo vile sou lamana. 15Anu mi sou kuluke uasi kalumo, lexe ta mitema sou xaixai noxou Satani ne ixiune'i sou ixali loxo ta mitema sou xaixai sou 'ilixo muisalilisi. Ia kaluxu noxi'a ne umomomo no anu 'ilixo noxi'a lakolisousi.
Paulo Mutooxu sou Tu'utu'umaxu Noxou
16Eni avikala la, ngamalanixu itema vile uno'ilo sou xovulaulau uasi. Ia lexe ngingi ngaxavutala aloxo ne, ioxe la ngano'ilo aloxo ngano'u mitema ane u'oxo vuluvulusi ne, mo sou eni amomomo sou atooxo sevile kitu'a. 17Mo eni melo avau tu'umaxo no anu 'ilixo sou e etooxo no anu ne, eni avivikala loxo Tila mumasaxa uasi, ia aloxo mitema ane uxovulaulau uvivikala. 18Xo loxo ta mitema tapiena ane'i a itootooxa'a loxo ta mitema sou lialia i'oxo'oxonu 'o, la eni kalumo ne atooxo. 19Ngingi nga'osa sou ngalomu se'isisi noxi'a ta mitema ane i'oxo vuluvulusi xo loxo ngingi ne xavutalamengi laixe musuku! 20Manina musuku, xo ngingi ne ngalomu se'isisi noxi'a ta mitema ane ipalupalusingesi mo ikalusou mimemimengi mo ikalakalavoingengi mo i'itine'i iuli noxinge mo isavalinge no alaiengi ne kalumo. 21 hEni amaela sou avikala lamana lexe nexi ne mamalanexe musuku sou ta'oxonu aloxo ne. Ma'ia ane itema vile pekia'u sou uitinu, eni avivikala loxo itema ane u'oxo vuluvulusi, lexe eni kalumo pekia'ilo sou a'itileli no anu.22Loxovaa, ane'i ta Evalaio? La eni kalumo. Loxovaa ane'i ta Isilaeli? La eni kalumo. Loxovaa ane'i Avalaamu ta xaixasou? La eni kalumo. 23 iLoxovaa ane'i ta mitema sou xaixai noxou Kalisito? Eni avikala loxo xavutalaxeni laixe uasi. Eni euli noxi'a sio. Eni exaxai xavileli mu'oki musuku, exolu no nano no anu taasou navunavu alaxu piena musuku, mo mivelo mu'oki alaxu piena musuku, mo male asoli lalalaxu. 24 jAlaxu ta'uve la eni eno'u vuate noxi'a ta Iutaia mavulovexa tatalu mo muxatele tami'a. 25 kAlaxu tatalu la mivelo no anu maxei, alaxu vile la mi'otoxo no anu kulu, alaxu tatalu la uaxa tila mumamulosilo, la epaipalunu voxo vile xe 'olovoxo vile no luaki loxousi. 26 lEni emuamua'i mutotomu. Eni male apuati no anu lexa mu'ani'ani mo aulua no avo'a ta mitema sou pakali no votevote'i, eno'u masua noxi'a ta tema tualasilo ta Iutaia la, eno'u masua noxi'a ta mitema ane ane'i ta Iutaia uasi, eno'u masua no nano no tuala tila, eno'u masua no sasila, eno'u masua no luaki, mo masua noxi'a ta vivilo e ilosi'a lavulavu kalakalavoi noxi'a ta mitema. 27Eni exaxaisou xaixai ialuxu musuku mo no 'olovoxo piena la aai uasi. Eni esolixo xe limilaxo 'esi'esi sou lexa mo voxo piena la a'ani uasi. Enixeni mimii sou utaluxu vasimelo uasi mo sivevelo la poluvuvu muvelo. 28No pa'umolu mimii latala ane ne, la no voxo utotomu ne eni taleli ialuxu sou asaxila'a ta temanu lalolalotu ne ukalusi. 29'Ena'ei ane mamalaxu io eni axamuli mamalaxo uasi? Uasi eni kalumo mamalaxo. Xe 'ena'ei ane mu'oxo susu io eni taleli u'elau uasi? Uasi eni kalumo taleli u'elau. 30Lexe eni aitileli la laixe lexe eni aitileli sou mimii ane umaxailo lexe eni mamalaxosi. 31Anu Lataua e Tila Iesu Momu, Anu e laixe sou ta'itinu ualasou utotomu mo kaluxu uasi ne, mulavusou lexe eni akalakalavoi uasi. 32 mNe Temasukasi la tatananu tuala Aletasi muvikalanu mitema sou usaxila'u xalee lia ane ne sou miloo sou aiaitenga sou tuala tila ne Temasukasi sou lexe itetelisilo. 33Ia uasi xo eni ne mitaaleli no nano no lakela io mikalaleli elu'e no anu aitenga sou sivo no vainu vimelu sou milu'elalixo mole e'ume exexee no avolu.
Copyright information for
ATA